რა არის პრესბიოპია?

პრესბიოპია არ არის დაავადება — ეს არის ასაკთან დაკავშირებული ბუნებრივი ცვლილება თვალში, რომლის დროსაც ადამიანს უჭირს ახლო მანძილზე ხედვა — მაგალითად, წიგნის კითხვა, ტელეფონის გამოყენება ან წვრილი ტექსტის გარჩევა.

პრესბიოპიის დროს ბროლი კარგავს ელასტიურობას, რის შედეგადაც სინათლე ბადურაზე სწორად ვეღარ ფოკუსირდება, გარდა ამისა, ასაკის მატებასთან ერთად თვალშიგა აკომოდაციური კუნთი — ცილიალური კუნთი კარგავს მოქნილობას, რაც ასევე ხელს უწყობს ახლო მანძილზე ფოკუსირების გაძნელებას.

პრესბიოპია ჩვეულებრივ იწყება:

• 40–45 წლის ასაკში

• ნელა პროგრესირებს

• დროთა განმავლობაში ახლოს ხედვა უარესდება

რა სიმპტომები აქვს?

პრესბიოპიის ყველაზე გავრცელებული ნიშნებია:

• დისტანცია: წიგნის ან ტელეფონის შორ დისტანციაზე გაწევის საჭიროება

• დაბინდვა: საკითხავ მანძილზე კითხვისას ტექსტის დაბინდვა

• დაღლილობა: თვალების სწრაფი დაღლა კითხვისას

• ტკივილი: თავის ტკივილი ხანგრძლივი კითხვის შემდეგ

• განათება: უკეთესი ხედვა კარგ განათებაში

სიმპტომები ხშირად ნელა იწყება და დროთა განმავლობაში ძლიერდება.

ვის ემართება?

პრესბიოპია:

• ემართება ყველას

• არ არის დამოკიდებული: მიოპიაზე (მინუსი), ჰიპერმეტროპიაზე (პლუსი) ან ასტიგმატიზმზე.

მაგრამ მნიშვნელოვანია:

• შორსმხედველებს (პლუსიანებს) ხშირად შედარებით უფრო ადრე აწუხებთ.

• ახლომხედველებმა (მინუსიანებს) შეიძლება ცოტა გვიან შეამჩნიონ დისკომფორტი.

როგორ მკურნალობენ პრესბიოპიას?

პრესბიოპია არ იკურნება მედიკამენტებით, მისი კორექციის რამდენიმე გზა არსებობს:

1. სათვალე

ყველაზე გავრცელებული და უსაფრთხო გზა:

• საკითხავი სათვალე

• ბიფოკალური სათვალე

• პროგრესული სათვალე

2. ქირურგიული მეთოდები

• ლაზერული კორექცია: LASIK Monovision-ის დროს წამყვანი თვალის კორექცია ხდება შორი მანძლისთვის, ხოლო მეორე (არაწამყვანი) თვალის — ახლო მანძლისთვის. შესაბამისად, ორივე თვალით ყურებისას ადამიანი არ საჭიროებს სათვალეს არც ერთ მანძილზე.

• ინტრაოკულარული ლინზები: ამ დროს ქირურგი იყენებს მულტიფოკალური ტიპის ლინზებს, რომელიც საშუალებას აძლევს პაციენტს დაინახოს შორ, საშუალო და ახლო მანძილზე უსათვალოდ.

👉 გახსოვდეთ: ყველა მეთოდი ინდივიდუალურად უნდა შეირჩეს ექიმთან ერთად.

სტატიის ავტორი: შუშანიკ ლომიძე